政是政非 ﹕咪再玩嘢喇，做實事啦！

人必自侮而後人侮之，自編自導自演民調，僅得300幾個人支持佢哋留任1年嘅議員，喺立法會嘅馬騮戲終於上周五首演咗喇，20幾條友仔為咗凸顕佢哋嘅與別不同，幾廿歲人仲好似小學雞咁，喺個議會度玩點指兵兵遊戲，個個嬉皮笑臉嘅賴皮樣，真係丟架，睇見都想作嘔！唔知佢哋乜嘢思維？咁樣做，就係議會抗爭咩？會贏到選票咩？抑或好天真咁認為，早已經同佢哋割?嘅勇武後生仔，會返嚟支持佢哋呢？簡直白痴！

立法會喺上周五舉行內會同埋財委會選舉正副主席，嗰20幾個唔嫁又嫁嘅議員，若無其事厚顏無恥，乖乖咁坐哂响度，斷估佢哋都冇咁好死㗎嘞，一定會標奇立異玩吓嘢，做番場戲，算係對一啲支持者（不過唔知仲有幾多？）交代吓嘅！但真係估唔到佢哋度條戲軌咁差，竟然要玩小學雞嘅「點指兵兵」！20幾條友，你提名我，我又提名你，提到冇得提就連建制議員都玩埋，提名對方做主席或副主席。目的就係拖時間，玩吓嘢咁話囉！

過去4年依班友仔玩嘢多過做嘢，除咗白逗高薪，攞住個議員銜頭作威作福之外，對個議會同埋對個社會有乜貢獻，大家有眼睇啦！佢哋自己亦都心知肚明㗎！想做正副主席？肯定阻住個地球轉啦！邊會當選呢？互相提名選主席，被人提名嗰個仲要扮「慎重考慮」，「勉為其難」嘅樣，之但係啲戲又屎，嗰樣鬼咁乞人憎！真係唔知咁樣玩法有咩用呢？係，本來半個鐘搞掂嘅事，係拖咗幾個鐘囉，但就係係咁多囉！「你有張良計、我有過牆梯」卒之建制派議員見招拆招，順利選出咗兩個委員會正副主席。

有時，都唔知應該點樣形容嗰班泛民議員！話佢哋蠢咩，又蠢唔哂，求其喺個議會度玩吓嘢又逗百幾萬人工，而家咁嘅時勢，真係好過做乜！但係又見得佢哋好精喎，事關今時今日香港咁嘅環境，香港人都期望快啲振興經濟，搞好民生恢復繁榮，但佢哋徧徧喺個立法會度阻住地球轉，真係神憎鬼厭，仲邊有運行吖！可能，佢哋或者仍然幻想咁樣做可以證明自己仍然係抗爭派，仲可以搏到啲徧激後生仔掌聲啦！如果咁諗，就更加係戇居夾耳聾嘞！嗱，係人都知，當嗰日佢哋為咗嗰筆唔捨得嘅俸祿而選擇留低之後，班後生仔已經決定同佢哋各行各路喇！咪再痴心妄想啦！

計我話，依班泛民返唔到轉頭㗎喇，而家應該洗心革面，切切實實做好份工，專心做實事，令香港盡快重回正軌。咁樣，可能仲會搏到一啲好感！如果唔係，佢哋蹉跎埋依一年，肯定玩完，仲會遺臭萬年，萬劫不復！正所謂浪子回頭金不換，希望佢哋回頭是岸啦！

資深媒體人

瑋公子