政是政非 ﹕ 警隊「一哥」完美示範為官之道

警隊「一哥」鄧Sir依一輪真係馬不停蹄，啱啱先粉墨登場著返套「一柴」警察制服拍宣傳片，先幾日8號風球，佢又出颱風更，除咗為同袍打氣之外，又親身體驗一下基層警員嘅辛苦，真係關懷下屬嘅好上司。嗱，依啲咪係做高官嘅典範囉，起碼佢唔係好似其他有啲官員咁樣淨係得個講字，而係身體力行去做㗎！

香港地唔少高官，日日坐喺冷氣房，自以為高高在上，出入都係高級場所消費，邊度知道坐喺茶餐廳基層小市民嘅民間疾苦吖！市民諗啲乜？需要啲乜？佢哋都唔知，所以諗出嚟嘅政策就離哂地！如果個個都好似鄧Sir咁貼地，香港人就唔駛而家咁辛苦啦！

講開又講，鄧Sir除咗體恤下屬之外，亦都係近年難得一見不卑不亢，而且好有「吉士」嘅官員。近日，九龍城區議會14個區議員，喺未徴詢其他議員同意之下，夾埋個區議會主席就決議唔俾警隊「一哥」出席區議會會議。依個完全係一個玩政治嘅決定，目的係要「一哥」難堪！不過，鄧Sir就不愠不火示範咗一場完美嘅政治公關騷，毫不退縮，仲主動約見記者，話俾全港市民知道，而家唔係警隊唔肯同九龍城區議會合作呀，而係有14條友仔把持住個區議會，唔俾佢出席㗎咋！「一哥」仲擺到明咁話：「我得一個人，你哋有14個人都怕咗我？」嗱，依種唔係為官之道囉，正所謂「為官避事平生恥」，今時今日香港依個政治環境，官員面對依種無理横蠻嘅刁難，千祈唔可以逃避。公道自在人心，好似鄧Sir毫不畏?咁面對挑釁，最終對方唔係自暴其短囉！

九龍城區議會單嘢，亦都俾大家睇清楚所謂嘅民主其實係揾笨實，依班新貴以前就批評區議會冇民主，又話人哋人多蝦人少，結果佢哋攞住爭取民主嘅光環入咗區議會，而家得到權力之後，就用更加獨裁嘅手段為所欲為！話說，日前九龍城區議會開會，有議員就質詢「一哥」依單嘢，點知個主席居然話未准許個議員發言，趕咗佢出會場。嘩，咁都得？大家都係民選議員，你唔啱聽就趕人走，咪一言堂囉，你哋玩哂啦！所以話，民主，只不過係用嚟奪權嘅口號嚟架咋，你哋睇吓台灣吖，民進黨上台之後幾咁獨裁吖，整治國民黨幾咁毒辣呀，而家連媒體「中天」，因為唔聽話都要被整！民主依家嘢，講就天下無敵，佢哋做起上嚟，就無能為力㗎喇！香港人，咪咁天真啦！

資深媒體人

瑋公子