政是政非﹕ 盡快同內地通關最實際

一場疫症，因為病毒檢測同隔離政策，搞到好鍾意旅行嘅香港人，被迫困咗幾個月冇得出境，真係人都癲。近日疫情反覆，香港嘅本地感染個案始終無辦法保持一段時間歸零，感染風險仍在，想要回復以前咁自由通關出行，睇怕到年底之前都唔樂觀！政府先前煞有介事咁宣布同新加坡達成初步協議，搞個乜鬼「旅遊氣泡」，話只要旅客做足測試，證明冇感染嘞，就可獲特許旅遊喎，但係work唔work呢？咁就唔知嘞！

依個計劃，聽起嚟好勁，但諗清楚，計吓條數，當堂窒步。依個「氣泡」嘅先決條件，係喺旅遊之前取得病毒測試證明，先可以出境香港，當入境新加坡時又要做一次。好嘞，當離開當地再返嚟香港，再要做一次。按照香港認可化驗所收費，每次檢測要收至少1000蚊，咁，即淨係驗測費斷估都成3000蚊。加埋旅費約4000蚊，條數都唔細㗎！雖然話香港人屈咗咁耐，好想出去透吓氣啫，但去一趟新加坡兩個人就成皮幾嘢，老老實實吖，真係好大考慮㗎！

旅遊業就呼籲政府出面，同啲化驗所傾吓，將個檢測收費降到每次二、三百蚊。不過，邊有咁容易吖！除非又係政府補貼囉，啲化驗所都要維皮㗎，點肯蝕俾你呀？嗱，就算香港肯減價，新加坡嗰邊亦未必肯同意啦！當然，政府咁積極搞「旅遊氣泡」，係好事，但倒返轉頭諗，既然花咁多精力咯，不如搞掂同內地通關先啦！喂，內地咁多旅遊點，香港人返去旅遊不在話下啦，仲有好多人嘅正常生活，係等住通關先可以恢復㗎！凡事都有緩急輕重，搞掂咗個內地通關，「旅遊氣泡」自然就係錦上添花啦！計我話，政府最實際係大刀闊斧，徹徹底底咁嚟一次強制性全民大檢測，好似青島咁，快快脆脆3日搞掂，揾出嗰啲隱形帶病毒者，令到香港本地感染清零維持一段時間，咁咪係好似澳門咁，同內地通咗關咯，以後一切都好辦啦！

政府做嘢，有時真係令人不解！好似最近咁，無啦啦開咗幾個檢測中心，搞咗幾日，點知無端端又話關閉！咁做乜啫，既然開咗，又有市民排隊檢測，即係有需要啦，點解唔可以繼續做落去呢？就算唔開哂咁多個，留番一個長期運作都好吖！又好似，要求嗰啲「特定群組」檢測，居然唔係強制性，派個樽俾佢哋自己返屋企搞，交唔交番去又唔知，咁測試嚟有鬼用咩！唉，依啲事就反映出政府喺抗疫工作上嘅思維混亂，進退失據，搞到而家都係事倍功半！

資深媒體人

瑋公子