政是政非﹕限聚放寬6人點解做一半呢？

有句話：「差之毫釐 繆以千里」，幾乎係人都識講，但係咪真正明其所意焉，又能掌握到說話中嘅精神，好好咁發揮呢？咁就好難講嘞！現實生活中，有唔少例子，都可以證明，好多人都係識講唔識做。嗱，好似政府公布咗明日放寬限聚令政策，本來應該皆大歡喜，點知就係啲官員諗嘢唔夠仔細，又冇心理準備會被人質，解畫解到唔湯唔水結結巴巴，好事又變咗壞事囉！

最新放寬嘅限聚令，將食肆用餐人數，由每枱4人放寬到6人。無論對餐飲業抑或市民嚟講，都係一件好事。不過，限聚令仍然將街上聚集人數維持為4人，咁就即刻引起爭議嘞！好簡單，6個人約埋去食飯，飲飽食醉之後意猶未盡，散咗席仍然企喺餐廳門口吹水唔想走，嗱，咁就已經犯法㗎喇，執法人員隨時可以6個都告哂，每人罰款兩千大元㗎！咁，挑通眼眉嘅媒體朋友梗係睇到問題所在啦，最直接嘅就係問個管事官員啦，但點知官員嘅答案，真係聽到人好炆憎！佢話喎：「我相信執法人員係會好理性咁去處理依個情況嘅！」吓，唔係吓嘛，法律嚟㗎，執法者係根據法例規定條界線執法，你過咗界就拉你告你囉，乜嘢理性唔冇理性呀！如果法例定義唔清晰，而靠執法者因應環境同埋所謂嘅理性執法，好危險㗎噃！大佬呀，如果有人唔理性，又或者好硬頸咁，唔理三七廿一「依法辦事」，有乜唔妥就等法官去判啦！咁，就會有好多「寃案」；好多爭議，個法庭就好唔得閒啦！

依件事又再反映時下嘅官員，真係諗嘢唔夠全面，又唔夠細緻，就係差咗嗰少少囉！如果醒啲，早就應該諗到依個漏洞啦！一視同仁，將街上聚眾人數都放寬為6個人，咁就冇得嘈啦！好，又當官員可能有「苦衷」，迫不得已要咁做住先。咁就唔該準備好一個自圓其說嘅理由，應付啲窮追猛打嘅媒體啦！喂，你諗唔到，就請教吓啲高人啦，起碼唔會好似而家咁，俾一個明會唔收貨，而且仲會繼續俾人插嘅答案啦！係囉，做嘢同諗嘢就差咁少少㗎咋，出嚟嘅效果就繆以千里啦！計我話，有心唔怕遲，既然而家大家都發現咗問題咯，官員就面對現實立即修正啦，快快放寬埋街上聚眾限制為6人，咁就冇得抝嘞！

資深媒體人

瑋公子