政是政非 ﹕擺明僭建都唔敢拆 究竟驚乜？

「只許州官放火， 不許百姓點燈」依一句話，用嚟形容公文袋嘅毛姨姨其實好適當，因為佢自己犯規就當睇唔到，而人哋犯規，佢就嘈喧把閉！而家有人倒返轉頭咬住佢唔放，佢就話人無聊！唉，今時今日啲立法會議員，點解啲質素會低到咁㗎？真係情何以堪囉！

前特首CY個基金，最近真係好神勇，除咗揼本懸紅鼓勵攬炒派「篤灰」之外，最近係咁咬住毛姨姨住宅僭建單嘢唔放，一定要毛姨姨有錯就要認，仲要企定定。CY今次好堅，攞到屋宇署回覆一名市民投訴毛姨姨間屋僭建嘅覆函副本，證明毛姨姨間屋個車房，僭建改為住宅用途，根本係違規，仲要求毛姨立即清拆，恢復原狀。咁，即係踢爆有人死口話自己冇僭建，其實一直係欺騙市民，擘大口講大話！嗱，大家睇吓屋宇署封信嘅內容啦，上面大大隻字，講明毛姨姨住緊間屋係違規㗎：「屋宇署已經發信予有關業主，指明有違反《建築物條例》的情況並提醒業主盡早恢復有關處所的原有用途。如情況未有改善，處方會採取進一步跟進行動」。

有咗依封信，犯規嘅人應該冇得抵賴喇掛！CY打蛇隨棍上，追問毛姨姨點解唔公開解釋佢認為自己寓所冇違反《建築物條例》？點解唔理屋宇署的要求，唔立即清拆僭建物，恢復原狀？正所謂「平生不做虧心事、半夜敲門也不驚」如果毛姨姨真係冇錯，咁就理直氣壯攞出證據公開辯解啦，駛乜閃閃縮縮，仲逃避記者追問，被人追到嘞，就侮辱人哋，話人哋唔係記者呢？嗱，依單嘢佢真係醜態百出，犯衆憎到痺！喂，毛姨姨，無論任職乜嘢政治立場嘅新聞機構都係記者，你把口就大大聲話尊重新聞自由，行動你就封殺新聞自由。你質疑人哋「係咩嘢記者」即係係你心目中早有把尺，自己友先認係記者，得唔得13歲?仔孭住個相機你都係記者！唔係自己友你就話人哋唔係記者，唔止唔答人，仲輕佻侮辱人哋！咁，你點尊重新聞自由呀！咪以為識講幾句英文，就將自己擺到高高在上啦，你嘅所作所為，真係愧為曾經做過新聞工作者喇！

公道自在人心，當日毛姨姨喺立法會，針對高官名人被揭有違規僭建物，嘩，幾咁義正詞嚴呀！自己犯上同樣錯誤，就扮唔知！有證有據嘞，官方出埋信嘞，就唔理！真係完美表演咗乜嘢係「有口話人、冇口話自己」，乜嘢係「待人以嚴、待己以寛」啦！不過，最令公眾氣憤嘅，係有關部門嘅無能表現！毛姨姨單嘢，先係由傳媒踢爆，結果見哂報嘞，有關部門只係出封信，警告下就了事，毛姨姨梗係一於少理，睬你都儍啦！過咗幾年，又有市民投訴嘞，部門又係咁意巡查下，又出封信警告算數，依然冇行動！而家前特首都出聲喇，部門仍然係乜都唔做！真係搞到人火都嚟埋！喂，官員呀，究竟你哋係懶吖，抑或怕咗某啲人嘅惡勢力呢？細佬哥都識啦：天子犯法都要與民同罪嘛，更何況依個只不過係區區一個不知所謂嘅「民意代表」啫！喂，你哋係官嚟㗎，有人犯規，就要執法啦，有乜好怕呀？又係嗰句囉：「為官避事平生恥」，你哋係職責所在，冇得避㗎！

資深媒體人

瑋公子