政是政非 ﹕中央出辣手，泛民议员去势

人大常委开会，决议DQ宣扬或者支持港独主张，拒绝承认国家对香港拥有并行使主权、寻求外国或境外势力干预香港特别行政区事务，或者具有其他危害国家安全等行为，不符合拥护中华人民共和国香港特别行政区的法定要求和条件，而喺第七届立法会选举提名期间被裁定提名无效嘅立法会议员。政府随即发稿宣布有4个泛民议员即时被DQ。

中央咁嘅决定，当然系引起政圈议论纷纷啦！廿几个泛民议员其实喺今个星期初，有消息预先流出之时已经开咗个紧急会议，商量对策。结果，倾咗几个钟头，达成咗个共识，就系如果𠮶4个被点名议员真系被DQ，佢哋一于集体总辞㖞！据闻喺倾嘅过程中都好有火花㗎，最后先至倾咗依个结论出嚟！嗱今日中央宣布咗喇，睇吓泛民点接招嘞！

一次过DQ4个议员，泛民梗系唔顺啦㗎嘞，但系唔少人就拍哂手掌㖞！喂，正所谓：“出得嚟行，预咗要还！”当日佢哋嘅所作所为有目共睹，佢哋做得出就预咗有后果啦！今日要去承受，亦都系理所当然，唔到你唔顺气㗎噃！如果真系有唔愤气，只能同佢哋讲句：早知今日，何必当初喇！

话时话，依班泛民议员今舖真系进退失据，玩政治游戏嘅道行有如小学鸡！查实如果要总辞，点解唔喺一个月前，立法会未展开新会期之前呢？𠮶时班友仔又搞民调，又搞公投，鬼咁肉酸?到留任！搏乜呢？唔通真系搏吓阿爷条藤条唔会霍落嚟，俾佢哋偷到鸡，坐享薪优粮准，仲喺度作威作福咩？好嘞，?到留喺立法会就正正经经做番啲好事啦，结果，仍然系搞破坏，拉布，自己大部人唔去开会，但系就猛点人数，阻住会议议程。喂，出成十几廿万人工一个月，咁様玩，咪好着数？广大市民看在眼里，大家明啦，唔驶讲嘢！

依班泛民议员呢趟真系自讨没趣，搞政治冇阵势，冇策略，更加冇风骨！智慧同能力，若果同上一辈泛民政客嚟比，真系争咗九条街！华叔在天之灵，见到咁嘅场面，真系喊得一句句囉！真系㗎，开讲有话：知己知彼百战百胜。泛民既不知己有几多斤两，连自己个定位都左摇右摆；既想拉拢揽炒派，又怕失咗温和派支持，结果系左顾右盼，前仆后继，溃不成军！佢哋更加轻视阿爷，以为拉住美国佬衫尾，就有人照起！唉，咁嘅智商，真系有如一位前领导人话斋：“Too simple , sometimes naive! ”喇！

资深媒体人

玮公子