政是政非 ﹕支持政府再支援各行業度難關

踏入12月，好快又到聖誕節喇，立法會今個星期又冇內會開，所以星期三開完大會，財委會主席波哥建議提前喺下午開埋個財委會，大家就可以拍下囉柚放聖誕假，兩個禮拜後再見啦！不過，財爺就冇班立法會議員咁爽嘞，事關佢正係傷緊腦筋搞緊份財政預算案。

新型肺炎疫情嚴峻，已經進入第四波，近日社區頻頻爆發，恐怕短期內難以控制；依場疫症已經徹底打殘本港經濟。所以財爺份預算案點都唔可以避開支援疫情，重振經濟。老實講吖，而家香港死到臨頭，所有香港人最關心嘅係點樣先至可以度過難關，個政府點様幫到我哋！至於未來嘅鴻圖大計，又或者政府點樣審慎穩陣為未來打算，真係冇人會理㗎！今次疫情對各行各業嘅影響唔係講笑，好多我哋知道嘅，例如旅遊、食肆、酒吧梗係嗌哂救命啦，但係仲有好多肉眼睇唔到嘅行業，個苦況慘到不得了，例如俗稱嘅「三行」工程公司，原來吊緊鹽水！

有一位做電業工程嘅小老闆訴苦話：建築業其實都好大影響，因為工程少咗，大公司就實行搶標制，啲細判頭為咗中標補住生意同埋工人，就算蝕本都要監平監殘出標，所以工人嘅工錢自然要降低啦，個細判頭食白果之餘，可能仲要貼錢，認真慘情！佢又話：之前政府個補就業計劃其實幫到好多㗎，但係而家話冇囉，真係唔知點頂落去！仲有呀，由於防疫措施，工人入地盤嘅防疫安排，亦都大增成本，所有工人出入前都要7日內檢測，依啲費用都由僱主支付，而工人每日嘅工時亦相對少咗，進度拖慢起唔到貨又俾大判罰錢，有苦自己知！好多细判頭公司已經捱唔落去喇！

嘩，真係唔講都唔知喎！見咁多地盤仲開緊工，以為三行嘅處境仲過得去，原來咁慘！所以財爺做財政預算案諮詢，真係要貼地啲，對社會各階層了解多啲，顧及埋依班苦主先得㗎。嗱，特首啱啱宣布話會喺聖誕節前，向立法會財委會申請撥款，特別支援受第四波疫情影響嘅行業，真係適時嘅「德政」，不過，希望啲支援，真係落到去例如上述嗰啲真正有需要嘅行業，咪鬼好似之前咁，益哂啲大財團喇！

資深媒體人

瑋公子