政是政非 ﹕支持政府再支援各行业度难关

踏入12月，好快又到圣诞节喇，立法会今个星期又冇内会开，所以星期三开完大会，财委会主席波哥建议提前喺下午开埋个财委会，大家就可以拍下囉柚放圣诞假，两个礼拜后再见啦！不过，财爷就冇班立法会议员咁爽嘞，事关佢正系伤紧脑筋搞紧份财政预算案。

新型肺炎疫情严峻，已经进入第四波，近日社区频频爆发，恐怕短期内难以控制；依场疫症已经彻底打残本港经济。所以财爷份预算案点都唔可以避开支援疫情，重振经济。老实讲吖，而家香港死到临头，所有香港人最关心嘅系点样先至可以度过难关，个政府点様帮到我哋！至于未来嘅鸿图大计，又或者政府点样审慎稳阵为未来打算，真系冇人会理㗎！今次疫情对各行各业嘅影响唔系讲笑，好多我哋知道嘅，例如旅游、食肆、酒吧梗系嗌哂救命啦，但系仲有好多肉眼睇唔到嘅行业，个苦况惨到不得了，例如俗称嘅“三行”工程公司，原来吊紧盐水！

有一位做电业工程嘅小老板诉苦话：建筑业其实都好大影响，因为工程少咗，大公司就实行抢标制，啲细判头为咗中标补住生意同埋工人，就算蚀本都要监平监残出标，所以工人嘅工钱自然要降低啦，个细判头食白果之余，可能仲要贴钱，认真惨情！佢又话：之前政府个补就业计划其实帮到好多㗎，但系而家话冇囉，真系唔知点顶落去！仲有呀，由于防疫措施，工人入地盘嘅防疫安排，亦都大增成本，所有工人出入前都要7日内检测，依啲费用都由雇主支付，而工人每日嘅工时亦相对少咗，进度拖慢起唔到货又俾大判罚钱，有苦自己知！好多细判头公司已经挨唔落去喇！

哗，真系唔讲都唔知㖞！见咁多地盘仲开紧工，以为三行嘅处境仲过得去，原来咁惨！所以财爷做财政预算案咨询，真系要贴地啲，对社会各阶层了解多啲，顾及埋依班苦主先得㗎。嗱，特首啱啱宣布话会喺圣诞节前，向立法会财委会申请拨款，特别支援受第四波疫情影响嘅行业，真系适时嘅“德政”，不过，希望啲支援，真系落到去例如上述𠮶啲真正有需要嘅行业，咪鬼好似之前咁，益哂啲大财团喇！

资深媒体人

玮公子