政是政非 ﹕抗疫專家都要政治正確

疫情日日係咁爆，啲不明源頭個案愈來愈多，好似總會有一個喺你左近嘅感覺，真係人心惶惶㗎！香港人而家望到頸都長，就係等疫苗快啲到，快啲打，頂住先。嚟到依一個地步，可謂生死關頭，其他一切已經係次要，保住條命仔至緊要。

所以，先前個政府宣布話明年1月就有第一批疫苗到港，自然就成為普羅大眾嘅熱門話題。喂，政府話引入3個唔同生產商嘅疫苗喎，打邊隻穩陣呀？雖然政府就話市民冇得揀啫，而且人各有志，總唔會全部人揀哂一様，但係人就係咁無聊㗎啦，自己做吓民調，問吓你係咪同我一樣咁諗都好呀，攞番啲數據參考吓亦無妨。於是，個個見到面，幾乎都有問依個問題，而最有趣係個個嘅諗法好唔同，就算揀埋同一款都有唔同嘅理據，好鬼過癮！

普羅大衆係咁啫，德高望重嘅專家又點睇呢？嘩，係咪讀飽書嘅人睇嘢真係同世俗人好大分別呢，要與別不同，先至可以做專家呢？早幾日，有位近排被公認係領軍抗疫嘅專家，竟然劈頭就答記者，話就算疫苗嚟到香港，佢唔會接種喎！吓，唔係啩？係呀，原來佢喺大學硏發緊一種噴鼻式嘅疫苗，好快有成果喇，自己硏發嘅緊係信自己啦，所以唔會打人哋硏發嘅疫苗喎！唉，專家呀專家，你駛唔駛咁老實呀？嗱，佢雖然冇話人哋嘅疫苗唔得，又冇叫人唔好打，但係佢老人家帶隊抗疫，行到咁前，人人睇佢頭，信哂佢喇噃，而家個個都話爭住快啲去打，佢話唔打喎！咁即係點呀，信佢定唔信佢好呢？

有牙痕友就話，而家唔止香港，直情係舉國抗疫，依位專家喺依個時候講啲咁嘅嘢，大唱反調，唔單止「政治不正確」，仲有危害「國家安全」之嫌添！嘩，咁就冇咁嚴重，不過，件事就可以說明，學者始終個腦袋好鬼單純，政治敏感度又唔夠，冇考慮到自己今時今日一言一語，一舉一動嘅影響力，大到影響成個社會，所以真係唔好噏得就噏！

資深媒體人

瑋公子