政是政非 ﹕支援防疫抗疫 民政局無名英雄

好快就過年喇，依個苦難嘅2020年總算捱過嘞！之但係疫情仍未改善，本港日日仲有幾十單確診，而不明個案都有10幾單；嚟緊天氣驟暖還寒，病毒有機會更加活躍，真係唔到你唔擔心㗎！政府部門更加係壓力超大啦，食衛局同醫護團隊喺前線防疫抗疫，原來負責主要支援嘅民政事務局亦都忙到甩轆！

香港嘅確診個案一日無辦法清零，危機都冇辦法清除，而香港人想通關，想外遊更加唔駛旨意！大家都知啦，冇通關外遊，經濟又點會好吖，所以，清零係全民嘅首要任務，要達到依個目標，市民肯配合，先至可以事半功倍！當局最近又收緊咗防疫措施，凡發現有兩宗不同源頭確診個案的住宅大廈，一定執行強制檢測令，所有居民都要強制核酸檢測，如果發現有病徵，更要安排隔離觀察。

嗱，咪睇少依啲工作呀，好鬼繁複同瑣碎㗎，一幢棟大廈閒閒地幾百至一千人，仲有人要返工，唔係人人都成日喺屋企㗎噃，淨係登記紀錄，保證每個人快而有序咁檢測，都已經N咁多工夫啦，仲要派發防疫物資啦，同居民心理輔導，等佢哋安心啦，都係好多人睇唔到，但係啲人員做到嘔嘅工作。仲有呀，早輪發現有幾幢大樓懷疑水渠播毒，需要緊急撤離居民，時間緊迫，得嗰幾粒鐘安排，仲要冇甩漏，唔容易㗎！依啲工作主要由支援嘅民政局孭飛，依班無名英雄，一直俾鎂光燈忽略，而喺度默默耕耘，其實功不可沒！當然啦，其他部門，例如警方、衛生防護中心嘅緊密配合都好重要，值得一讚。

正如本欄先前一直強調，抗疫防疫係一場戰爭，係一環扣一環嘅，唔可以只由一個部門單打獨鬥。而家各部門衷誠合作，互相配合，做出好嘅成績，市民係感受得到嘅。期望喺依一種官民一心嘅氣氛之下，我哋好快打贏依場疫戰，恢復元氣，迎接新嘅一年！

資深媒體人

瑋公子