政是政非 ﹕支援防疫抗疫 民政局无名英雄

好快就过年喇，依个苦难嘅2020年总算挨过嘞！之但系疫情仍未改善，本港日日仲有几十单确诊，而不明个案都有10几单；嚟紧天气骤暖还寒，病毒有机会更加活跃，真系唔到你唔担心㗎！政府部门更加系压力超大啦，食卫局同医护团队喺前线防疫抗疫，原来负责主要支援嘅民政事务局亦都忙到甩辘！

香港嘅确诊个案一日无办法清零，危机都冇办法清除，而香港人想通关，想外游更加唔驶旨意！大家都知啦，冇通关外游，经济又点会好吖，所以，清零系全民嘅首要任务，要达到依个目标，市民肯配合，先至可以事半功倍！当局最近又收紧咗防疫措施，凡发现有两宗不同源头确诊个案的住宅大厦，一定执行强制检测令，所有居民都要强制核酸检测，如果发现有病征，更要安排隔离观察。

嗱，咪睇少依啲工作呀，好鬼繁复同琐碎㗎，一幢栋大厦闲闲地几百至一千人，仲有人要返工，唔系人人都成日喺屋企㗎噃，净系登记纪录，保证每个人快而有序咁检测，都已经N咁多工夫啦，仲要派发防疫物资啦，同居民心理辅导，等佢哋安心啦，都系好多人睇唔到，但系啲人员做到呕嘅工作。仲有呀，早轮发现有几幢大楼怀疑水渠播毒，需要紧急撤离居民，时间紧迫，得𠮶几粒钟安排，仲要冇甩漏，唔容易㗎！依啲工作主要由支援嘅民政局孭飞，依班无名英雄，一直俾镁光灯忽略，而喺度默默耕耘，其实功不可没！当然啦，其他部门，例如警方、卫生防护中心嘅紧密配合都好重要，值得一赞。

正如本栏先前一直强调，抗疫防疫系一场战争，系一环扣一环嘅，唔可以只由一个部门单打独斗。而家各部门衷诚合作，互相配合，做出好嘅成绩，市民系感受得到嘅。期望喺依一种官民一心嘅气氛之下，我哋好快打赢依场疫战，恢复元气，迎接新嘅一年！

资深媒体人

玮公子