政是政非 ﹕應該表揚前線人員無私抗疫

元旦假期連周末有3日，往常日子香港人最愛趁機去短途旅行，靜靜地歎番幾日。但係今次遇上個死唔斷氣嘅疫症，周圍封哂關，真係郁不得其正，認真冇癮！之不過，點都好過一班仍然為抗疫防疫苦戰嘅人員，佢哋連放假都犧牲，仲要面對隨時染疾嘅風險，依種奉獻社會嘅精神，值得表揚！

依幾日，本港嘅確診感染數字回落到40-50宗，算係一個好消息。至少人人有機會望見家鄉，相比最近又爆到七彩嘅英美同埋歐洲，香港人係應該有啲安慰嘞！當然，依樣嘢真係同人民素質好大關係，香港人自愛自重，人人肯戴口罩，大部分願意犧牲一些社交活動，肯改變生活模式配合政府防疫政策，所以防疫抗疫終於見到成績，事實上，香港人真係應該自豪嘅！

但係，我哋亦都唔好抹煞政府抗疫人員嘅功勞。雖然抗疫初期，當局有啲離地，又有啲反應遲鈍；而喺推動政策嘅時候，事前對民情嘅了解未夠透徹，但係大部分嘅香港人都唔會質疑政府防疫抗疫嘅決心，尤其當疫情進入第四波之後，當局一再收緊防疫措施，控制疫情嘅效果就更加明顯嘞！嗱，個社會其實好公道㗎，政府做得唔夠好，梗係批評佢啦，但係班前線人員夜以繼日，日以繼夜咁為市民抗疫防疫點會睇唔到呀！

喂，大佬呀，放元旦假期之前，有40幾棟大廈居民要做強制檢測喎，真係聽見都知係一件艱巨工作啦！但係前線嘅抗疫人員義不容辭就扛起任務，而更加難得嘅係民政局、社署、警方依啲支援部門二話不說全面配合，短短幾日有序完成，令人鼓舞。特別想提下，香港公務員既有才能幹勁、又有台型，向來喺國際被公認係優秀團隊。如果能夠更加貼地啲，了解多啲民間疾苦，制訂同執行政策，多啲喺普羅大眾嘅角度去睇，香港絕對經得起風浪起跌，無懼任何波折嘅！總之都係老老套套講句：大家加油啦！香港人，就算天跌落嚟，都頂得住嘅！

資深媒體人

瑋公子