政是政非：香港清零 由我做起

天寒地冻，黄昏条街啲舖头已经闩晒门，真系倍觉凄清！唉，日日仲有几十单确诊，个疫症唔断尾，政府就唔会放宽限聚令，亦唔会通关，个市冷清清咁，仲边度有运行吖？香港一日唔清零，都唔会有好日子过！老实讲，事到如今，喺疫苗未到之前，防疫措施官方已经做到尽㗎喇，想更加有效果，就真系要全港市民合作，由我做起。

咁应该点样做呢？其实好简单，只要人人肯花少少时间，依时依候去做检测就得啦！而家政府开咗咁多个免费检测中心，又喺地铁站免费派发测试樽，方便到不得了，只要每个人每星期做一次，既可以保障自己健康，如果唔好彩有事咯，可以即刻求医。当局又立即可追到源头，截住散播，百利无一害！有位朋友，佢真系咁做㗎，佢仲费事增加公共卫生服务负担，自己俾钱去做测试。佢话：花两百几蚊就知道自己无事，又唔怕惹到屋企人，仲叫埋屋企人一齐去做测试，双重保险之下，个个安心，精神压力都少好多添。系呀，依位仁兄向来活跃，本来日日happy hour，晚晩有饭局，而家酒吧唔开，夜市又冇咗，本来有啲颓！之不过，佢将自己依个做法，叫哂所有朋友去做，一股正能量周围散播，得到好多人嘅认同，填补番佢唔少失去社交活动嘅空虚。

嗱，人就系咁㗎嘞，当见到曙光，有咗希望自然就会开心好多。试谂下，如果全香港市民都好似依位仁兄咁正能量，咁咪好快望见家乡囉。明嘅，人系有惰性嘅，而且钟意揾借口，唔系死到临头都唔肯蚀底少少，所以，要牺牲返工或者休息时间做检测，咁鬼麻烦，咪搞啦！又时时有种侥幸心态咁谂：六合彩又唔见我中，边会咁好彩俾我揩到嘢吖？于是，明明街口有免费检测，行两步就可以做都唔做！然后揾借口话自己唔系唔想做，系鬼咁忙囉！话俾大家知吖，依只新冠肺炎唔睇得小㗎，欧美轻视佢搞到咁大镬，你哋唔系睇唔到嘛？就连内地，本来已经几乎搞掂嘞，点知河北石家庄最近就系少少松懈啫，又搞到一镬泡喇！正所谓：好嘅唔灵丑嘅灵，六合彩唔嚟揾你，但系个病毒就偏偏遇上你！咁你又吹胀咩！

所以，自己定期做测试，主要系为自己呀！保障自己又可以同时为防疫出吓力，利己又利人，何乐而不为呢！话时话嘞，作为雇主嘅亦都应该支持下雇员嚟做依件事，好理解有啲雇主唔方便俾员工在家工作，但俾佢哋返工迟些少，或者放工早少少去做免费检测，睇怕都唔会令佢哋好大损失挂？况且，员工健康返工，对公司亦有保障吖嘛，系咪？嗱，总之都系咁话啦，香港要及早清零先有得救，如果要清零，人人就要“由我做起”，发挥团结合作力量，我哋好快就见到光明。

资深传媒人

玮公子