政是政非 ﹕ 今日为官唔容易，系唔系都俾人闹！

大家唔知有冇发觉，自从立法会少咗班搞搞震嘅泛民之后，建制议员喺议会上，针对官员嘅批评激咗好多呢？又有冇发现个别监察政府嘅媒体，对官员嘅鞭鞑开始有啲无的放矢，过火咗啲呢？老实讲，官场的确有唔少官僚歪风，啲官有时都好鬼“离地”，议员同媒体嘅责任系都监察政府，批评官员无可厚非，但一定要有根有据，情理兼备先至可以令人信服，千祈咪为闹而闹！

的而且确，閙人系好爽㗎，尤其对方任你闹唔还口，仲更加过瘾添！不过，究竟你閙对方嘅目的系乜先？唔系为发泄吖嘛，系因为佢哋做得唔好，所以恨铁不成钢，先至閙醒佢哋，等佢哋改过吖嘛！但如果为闹而闹，又或者搞针对咁闹，就系过份嘞！最近政府加强防疫力度，调动咗入境处同海关依啲纪律部队几百人，去帮手追纵确诊紧密接触者下落。本来系一件好事，而家全城抗疫，纪律部队发挥所长，用佢哋侦缉智慧同能力出一分力，简直系人尽其才啦。作为部门首长嘅入境处长同埋海关关长，到场为同袍打吓气，正常啫，又有乜好挑剔呢？之但系有人就钟意鸡蛋挑骨头，话啲首长搏出位，搞政治骚㖞！喂，大佬呀，今日做官真系难，系唔系都俾人闹！上司鼓励下属都错？打气唔啱咩？唔系挂！唔做你哋又话，做你哋又弹，做啱你哋都唔高兴！有冇咁矫枉过正呀！而家香港咁克难时期，应该要多啲鼓励，多啲欣赏人哋嘅长处吖嘛，样样嘢都睇唔过眼，吓吓有弹冇赞，又有乜谓呢！

社会系需要和谐㗎，依个定律系之前嘅人撞过好多次板，先至学到嘅智慧呀。不过，近年唔知点解，社会冒起咗一种极端分化嘅歪风，唔同意见就要斗到你死我活，破坏哂社会和谐！大家都知啦，当人嘅情绪高涨时候，往往会失去方寸做错事，当冷静落嚟先至恨错难返，已经太迟喇！所以心平气和，正面啲去睇嘢，社会气氛祥和咗，对大家都好。时下啲人将“和谐”丑化成“河蟹”，贬低依两个字真正意义，其实相当反智！睇吓美国侵侵嘅下场，大家就应该明，佢就系和谐嘅叛徒，吓吓撑到行唯我独尊，卒之咪俾人背弃囉，依个世界唔系有权就大哂㗎！

话说回来嘞，香港依个弹丸之地，咁多年嚟，都系靠香港人𠮶种毫不畏惧嘅正能量冲破万难，渡过好多波折。今日我哋拥有嘅一切系得来不易㗎。2019年一场社会运动，加上依场仲未埋尾嘅疫症，香港已经衰到贴地㗎喇，我哋再冇本钱去你斗我，我践你咁内耗喇！大家不如用一个正面态度，互相包容，彼此尊重，和谐共处夹手夹脚，谂计仔搞返好个香港啦！

资深媒体人

玮公子