政是政非 ﹕全民一心 配合圍封小區檢疫

依舖真係㷫過火屎嘞，今日啲記者啲質素點解真係會差到咁㗎？講緊乜？咪就係講緊油麻地佐敦圍封囉，班記者喺圍封之前，就入住咗封鎖區嘅賓館，親身體驗被圍封居民强制檢測嘅真實情況。點知港台嗰位記者好做唔做，竟然話被圍封之後，居民收到嘅物資淨係得杯麵同埋罐頭喎，仲質疑當局安排不足，無提供罐頭刀同埋煑食工具喎！

據知，被圍封嘅居民，獲派發嘅物資，有蒸餾水，飲料、蛋糕仔、水果、仲有港人至愛嘅罐頭豆豉鯪魚同埋茄汁豆添。喂，依啲食物擺到明就係俾大家急就章頂住先㗎啦，杯麵用滾水淥下就食得啦，罐頭全部係易拉環，一拉就開㗎喎，乜蛋糕仔，水果要煑熟嚟食咩？港台個記者係咪被縱慣呢？諗住好似賈寶玉咁，飯來張口，水來濕手，餵埋你食先至滿意呢？咁煞有介事咁話當局冇安排煑食工具，唔知係咪佢唔識用熱水淥杯麵，抑或連易拉環都唔識用吖，定係佢鐘意煑熟啲蛋糕同水果嚟食呢？不如蒸條東星斑，整煲佛跳牆俾佢食好唔好呀！

老實講，當局提供依啲食物，用嚟頂48小時嘅圍封，快快脆脆完成檢測就解封囉，依啲物資係咪足夠呢，就見仁見智啦，但唔夠食咪再去攞囉，冇人唔俾你再攞嘛！大家都知啦，圍封強制檢測係迫不得已嘅措施，大家都想香港好，咪合作啲，忍耐一下囉！疫情至今剛剛一年，本港染疫已經過萬宗，我哋唔可以再拖㗎喇，政府果斷圍封小區，強制居民檢測，係要本港盡快達到清零目標，早日通關，復甦經濟。

大家知㗎，圍封小區唔係一件簡單嘅事嚟㗎，除咗民政事務局同食衞局係主力之外，五大紀律部隊所擔當嘅支援更功不可沒，仲有其他部門人力物力資源配合，可以講係對政府一次空前最大考驗。而且，圍封小區好有可能仲會更多，係一場漫長嘅戰鬥嚟㗎！冇錯，政府資源、人力物力都多，但唔係萬能，任何嘅措施，特別係好似圍封小區強制檢疫依啲大Project ，幾咁周詳都有不足，大家發現問題咯，咪即刻改善囉！作為市民，應該好appreciate一班不眠不休工作人員嘅服務精神同埋辛勞工作，俾佢哋多啲支持鼓勵。好似嗰位港台記者咁雞蛋挑骨頭，扯後腿嘅心態，實在真係要不得嘞！

資深媒體人

瑋公子