政是政非 ﹕咪移民英國做二等公民

香港依排又興起「移民」依個話題，英國佬搞BNO5+1，睇落好似係移民英國嘅好機會，但係英國佬邊有咁好死呀，俾佢算過度過，睇穿佢龍嘢，只不過係想吸人才兼吸錢嘅詭計啫！土生土長嘅香港人，帶埋副身家過到去，適唔適合呢？如果頂唔住又點呢？真係要諗清楚呀！

移民真係唔簡單㗎，有啲人以為適應下氣候，改變下生活環境，揾到份工就搞掂，其實仲有好多生活上嘅細節問題，先至最難捱！就以一個過來人身分同大家分享下啦：首先，語言係一個好重要嘅問題，無論你英文有幾好（何況唔係個個香港人都咁好英文），始終都叻唔過鬼佬卦，你一出聲，就一定有口音，俾人知道你唔係地道咯，即係唔係自己友啦，咁你就有可能遇上唔公平對待喇！係呀，咪以為鬼佬一味話尊重人權，就唔會歧視你呀！你始終唔係自己人，點會一視同仁吖！嗱，就算你真係冇語言嘅問題，但一定頂唔順嗰度嘅工作效率同埋節奏。香港人講求效率，乜鬼嘢都要快，一日可以做幾件事。不過去到嗰度，個個慢條斯理，你急咩，I am sorry 囉！Take it easy 啦！

仲有呀，人最需要嘅係朋友，要有共同話題，去到嗰邊就算俾你識到朋友，關係都好似隔咗萬重山咁，傾唔埋欄㗎！因為大家文化背景唔同，又冇共同經歷，即使俾你哋發掘到共同興趣（例如英超足球），都冇咁過癮啦！不過，你可能會諗，捱下啦，明天會更好嘅，頂唔順先算啦！嗱，喺以前可以咁諗，因為仲有回流依個選擇，但係而家如果你真係信英國佬嘅BNO5+1，就係一條不歸路，返唔到轉頭㗎喇！到時你只能夠硬住頭皮，繼續委屈自己黯然咁度過餘生啦！

英國佬計過數，估計有數以十萬計香港人移民英國喎，佢哋個算盤就打得響嘞，以為今次執到寶！計我話，詭計多端嘅英國佬依次計錯數啦，香港人咁鬼叻，邊會咁儍仔吖，香港始終係我哋嘅屋企，有乜嗌霎自己屋企人四四六六拆掂佢啦，有乜風雨咪一齊去擋囉，移民去到嗰啲山旮旯地方，有起事上嚟，叫天不應，叫地不靈，咪搞喇！

資深媒體人

瑋公子