政是政非：扫一扫　安心出行　文：玮公子

自从政府放寛限聚令，可以4人同枱，兼且晚饭食到10点之后，我哋嘅生活开始慢慢正常番喇！夜晚行出街当堂多咗好多人，条街冇咁静，个市感觉上好似旺番好多。的确系，约埋几个知己食餐饭，吹吓水，真系一个好好嘅减压方法，香港人依两年，不知不觉抵受咗𠮶啲无形压力，其实唔觉唔觉积埋，都好大镬㗎！

嗱，食饭吹水自不然话题多多，政府搞咗个“安心出行”App，规定市民出入食肆都要扫一扫，逐渐成为大家嘅习惯，亦例必成为饭局嘅热门话题。“喂，老友，你扫咗未呀？”依句说话，坐喺食肆两个钟，起码都听到几次。依个App可以话系食肆放宽限聚同埋同枱人数嘅条件之一。当局要求食肆有责任监督顾客入座时，必须要扫一扫，留低纪录方便追寻，系防疫措施嘅重要步骤，如果人人配合，对抗疫防疫好大帮助。但系系徧徧有人谂坏脑，话自己个私隐权俾人侵犯咗㖞！所以就采取不合作态度。

香港几乎人人都有手提电话啦，下载个App其实话都冇咁快。但系当局仍然考虑到有部分人士唔系咁识做依个动作，于是容许可以用文字纪录方式，顾客只要填低简单资料就搞掂。点知，仲系有人钟意玩嘢，唔肯正正经经咁填，写埋哂啲冇厘头资料，假嘅电话号码。食肆职员怕得罪客人，又怕引起纷争，当睇唔到，唯有照单全收！仲有呀，先几晚食饭，公子亦亲眼见到一个现象，同枱4人，除咗公子同另一位朋友乖乖咁扫咗个App之外，同枱一对夫妇，根本就当冇件事，坐低就叫𩠌食饭！我哋问佢点解唔扫一扫，佢哋就一副不以为然嘅样，睬你都嘥气！唉，依对夫妇屋企从来唔开饭，晚晚出街食，系依间食肆常客，佢唔扫App，职员都唔敢提，于是制度就有嘞，不过就冇切实执行，佢哋冇事由自可，有起事上嚟，点追查呢？

人要自重，先至得人尊重，安心出行App嘅作用，大家都明，佢系要大家重视、配合，所发挥嘅作用先至更大。咪净系识得批评啦，合作啲，每人做好本份，一齐抗疫先至成功。

资深媒体人

玮公子