政是政非 ﹕改革选举　好戏在后头

北京嘅两会会议系政圈大事，虽然讨论嘅系国家政策，但唔多唔少都有涉及香港事务。今年更加不得了啦，事前已经盛传会有改革香港选举制度嘅方案，关心政治嘅人士梗要牛咁眼?到实啦！嗱，今年涉及香港嘅全国人大会议的第七项议程，为《全国人民代表大会关于完善香港特别行政区选举制度的决定（草案）》，会议就未开，消息已经满天飞。

消息人士就话：立法会将有翻天覆地嘅变化，由而家嘅70席大增至90席；现时地区直选占35席会将削减；而喺2000年之后已经消失嘅“选举委员会”议席将会“复活”，同功能组别鼎足三立，成为立法会第三大势力。选委会议席复活，亦都意味依个组织会有所改变，有传会由现在嘅1200人增加至1500人，而新增嘅立法会议席，亦都会由委员互选产生。哗，依个改革真唔系讲笑，成事之后香港嘅政治游戏又会换过一个全新玩法喇！

有人就担心，将直选议席减少会减少咗民意嘅代表性。嗱，件事可以正面啲睇，地区直选虽然系一人一票产生，但喺制度缺陷之下，选出嚟嘅系咪真系咁有代表性？质素系点？有目共睹啦！过去几年，部分选出嚟嘅议员，玩嘢多过做嘢，政局一片混乱，正因为咁，政府施政亦都寸步难行！今次改革，将议席增加到90席，更多唔同范畴嘅人才可以加入议会，立法会嘅代表性就更大啦！老实讲，地区直选依种埋身肉搏嘅泥浆摔角，唔系人人都钟意，好多精英往往因为咁而唔肯入局，而采用选举委员会嚟招纳人才，就冇咗依个顾虑啦！

初步估计，人大会议通过咗依个选举改革方案之后，就交人大常委会跟进，然后再交番俾香港政府完成立法程序，今年9月立法会选举未必赶得切举办喇！而嚟紧几个月，政圈就热闹囉，选举委员会依个组织既要选特首，又可以有机会选立法会议员，究竟点样先可跻身喺依1500名之内呢？将会有一个群雄力争嘅精彩局面，我哋真系要担定櫈仔，等睇戏喇噃！

资深媒体人

玮公子