政是政非 ﹕疫情受控 朝新路向回复正常

上个星期四，行政长官终于可以正正常常，冇人骚扰之下，喺立法会完成咗佢个半小时嘅答问大会。依次同立法会议员嘅交流，由政治范畴中“完善选举制度”嘅跟进，以至民生关注嘅“控烟标准考量”，甚而城市发展项目嘅“沙岭殡仪城”都涉猎探讨，可谓内容丰富。希望依个好嘅势头，可以keep住落去啦！

阿爷出手完善重新港选举制度，将来香港嘅政治文化同埋游戏规则，会有重大改变。而家好多细节未出，政团同政客要点样部署应对，仲未有明确方向。阿爷依铺讲到明要攞番个主导权，究竟会留番几多空间俾大家去争呢？暂时冇人会知！“执生”向来系香港人强项，政坛中人惟有昅实个形势发展执生喇！之但系“爱国者治港”依条法规，阿爷就毫无悬念咁话俾香港人听，你如果唔爱国，就唔驶旨意做政府工，更加唔好谂住喺个政圈度搞搞震嘞，若果你仍然有幻想，以为阿爷会扮唔知？就太天真喇！

答问大会上，有议员问行政长官，香港啲官员同埋𠮶啲所谓专家，喺制定政策同咨询参考意见嘅时候，习惯只用国际标准，对国家嘅意见、调査报告、甚至法则都视而不见！例如最近好heat嘅规管新型烟草问题吖，立法会起草委员会大部分委员都好勤力，参考咗包括内地同其他各国资料，权衡业界同64万烟民权益之后，达成咗一个共识，就系同意政府“禁售电子烟管制加热烟。依个同时亦都系国内现时嘅标准，情理法兼备。不过，代表政府出席嘅官员不但冇向议员提供国内资料，就连议员向佢哋提出，官员仍认为两地情况唔同，法制唔一样等诸多借口，死牛一边颈，坚持两种烟都要禁。虽然唔系样样嘢要跟足国家先至系爱国，但议员就问行政长官：作为特区官员，依种轻视甚至无视国家现况，连参考都拒绝嘅态度又啱唔啱呢？

好嘞，讲番疫情喇，行政长官啱啱宣布咗“疫苗气泡”，系本港嘅防疫新路向，如果市民合作，肯打疫苗，肯下载安心出行，生活就可以慢慢恢复正常。食肆可以分阶段由4人限聚逐步加到12人；宴会限聚亦可以最高人数去到100人；而市民最关心嘅通关，开放个别国家旅游气泡，而返内地嘅通关，亦都先放寛货车司机嘅检测要求。即系话，一切向好嘅方面发展，如果疫情受控，市民合作，我哋就望见家乡喇！香港人，加油啦！

资深媒体人

玮公子