政是政非：酒吧限聚漏洞　害苦守法东主

疫症之下，香港人无哂消遣，俾防疫社交限聚令，搞到好鬼腌闷！最近，连续廿几日无不明源头个案，当局又好似松咗！市民近日对于限聚令都已经习惯咗，不过，防疫嘅嘢做多总好过做少，况且，唔知个病毒会变种到点，大家一旦放松，再次社区爆发，香港肯定玩完！限聚令的确打击市面生意，但又必须要做，如果大家跟住法例做，同甘共苦心甘命抵，但系偏偏有人就唔守规矩，仲当执法机关无到，咁就唔可以容忍喇！

好似酒吧业就系嘞，根据当局最新的酒吧限聚安排：所有员工同埋顾客，一定要接种至少一剂疫苗，而所有顾客必须使用“安心出行”。营业只能至凌晨两点，每枱最多两人，场所容纳人数为上限的50%。先唔讲个规定系咪过严，公共卫生要顾及大围福利，无可能个个都满意，只要大家跟住规矩做，开门做生意各师各法，有人生意好无得妒忌，有人拍乌蝇系佢唔够运，大家认命，永无投诉。之但系，有人规矩守到足，样样执到正，就日日俾客黑面投诉，跟住索性唔帮趁！而有人偷鸡犯法，任啲客为所欲为，就客似云来生意兴隆！最㷫就系冇人去管冇人去理，搞到守规矩𠮶啲人好唔愤气！

你有张良计，我有过墙梯。非法酒吧密密开已经离谱嘞，点知仲有班本来攞正牌开酒吧嘅友仔，费事俾个限聚令阻手阻脚，索性门都唔开扮停业，实情就系暗中做熟客生意；佢哋既然唔系正常营业，自然就唔理所有规矩啦，啲客无拘无束玩得开心，于是生意密密做，揾到盘满钵满！反而“忠忠直直，终须乞食！”依足规矩做𠮶啲酒吧，就门堪罗雀，嗌哂救命！你话几咁唔公平吖！可能大家会问，喂，依种情况连公子你都知，无理由执法单位唔知㗎㖞？系呀，执法人员咁多线眼，梗唔会唔知啦！但系正所谓：道高一尺魔高一丈，除非执法人员吓吓放蛇捉到应，否则佢哋闻风先遁，阿Sir未到，已经散走哂啲客！大家都明白，执法人手唔系咁多，唔可以成日玩依啲捉迷藏游戏，但如果对依啲无视法纪份子只眼开只眼闭，变相就系伤害咗守法嘅人！其实，执法部门依把尺真系要度准啲呀，如果唔系，引起嘅反效果，真系唔讲得笑㗎！

依场疫症搞咗两年，病毒变种又再变，真唔知会搞到几时！全城防疫，隔离措施在所难免，酒吧生意的确难做，但系难归难，价值观唔可以变，做咩嘢都要有条底线，一定唔可以过界！正所谓，人在做天在看，做衰嘢嘅人总会有报应嘅，若然未报，只不过系时辰未到啫！

资深媒体人

玮公子