政是政非 ﹕血濃於水點會淡過杯滾水

香港人向來善良，好有愛心，正因為咁，所以得天獨厚，天災人禍相對較少。依幾日，睇見河南水災嘅慘況，真係好震驚！災民無助同埋嗰種惶恐嘅眼神，睇見都難過！內地同胞同我哋血濃於水，香港人又應該係時候伸出援手喇！

河南鄭州暴雨成災，長江氾濫引發嘅千噸洪水住來勢洶洶，衝破堤壩湧入城市，淹沒街道樓房，摧毀地下鐵路，破壞所有公用設施。城市癱瘓，停水停电，數以千計市民來不及走避，有死傷待救，有被困危樓，一時之間，繁華鬧市頓成澤土，損失巨大。

大自然嘅力量原來真係好可怕，人豈能勝天？任你耗資百億，如何精密設計泄水排洪，誰知天發雷霆，竟然不堪一擊！鄭州嘅慘況，真係俾世人一次好好反省，城市發展固然重要，但係千祈唔好忽略大自然嘅破壞力！另一方面，又再證明互聯網威力無窮，洪水湧入淹滅城市嘅景象；數百人被困地下鐵路嘅慘況；武警奮不顧身救人嘅英勇，我哋香港同胞好快就喺互聯網睇到，歴歴在目感同身受！邊個仲會亂噏，話內地封鎖消息，隱報災情呢？今時今日，依種抹黑，不攻自破喇！

喺以往，毗鄰地方發生天災，港人出錢出力，積極募捐賑災，爆棚愛心遍達各地，令人感動。最令人印象深刻嘅條90年代內地華東水災，香港喺短短10日，就籌咗6.47多億港元賑災，認真厲害。2008年，汶川大地震，死傷枕藉，香港人再展愛心，籌款賑災加上協助重建，數額高達百億元。近幾年，香港社會政治化，一種莫名其妙嘅偏激思維令到好多人淹沒本性，迷失方向，血濃於水變咗淡過滾水！

不過，香港人始終善良，當大家見到同胞受苦嘅畫面，除非佢壞咗個腦，又或者泯滅人性啫，否則，又點會唔出手相助呢？嗱，大家睇吓，今日已經有名人明星率先捐款賑災嘞，謝霆鋒捐100萬，容祖兒又立即嚮應，政界女強人葉劉不甘後人，又捐出50萬。依種充滿愛嘅正能量立即產生拋磚引玉嘅作用，據聞已經有商會社團紛紛起動募捐賑災。係呀，香港精神又返番嚟喇！其實大部分香港人都係明是非，有良知嘅！你，我，他，而家最應該做嘅，係有錢出錢，有力出力，捐錢嘅嘢，唔理多少，就算係一蚊都好，都係心意！河南鄭州同胞水深火熱之中，我哋唔好猶豫喇！

資深媒體人

瑋公子