網約車發牌考起政府　期待九龍城再現繁華　文：瑋公子

【昭傳媒】報導日期： 2026 年 6 月 8 日

眨吓眼4年，原來小弟上次喺依度同大家吹水，不知不覺就4年。電視劇有句流行對白「人生有幾多個10年？」其實，何止10年，4年其實已經好長。當年暫時擱筆，係因為嗰幾年，經歴過社會運動、疫情、經濟蕭條！自己失去咗動力，所以一Hea就不知不覺4年喇！

喺依一段唔算長又唔算短嘅日子，見到嘅係不死精神嘅香港人咬實牙關咁樣熬過嚟！日子難過始終日日過，實在令人欽佩！由於地緣政治因素，香港難以獨善其身，好在政府當局勵精國治，在國家強大支持下輕舟屢過萬重山，實在慶幸。

如今全球經濟都在樽頸，中東戰雲密布，各國為保利益爾虞我詐，香港未來發展仍存在極大變數，作為香港人，也希望出一分力量，為香港打氣，以正面樂觀態度鼓勵大家一起砥礪前行，闖出新天。

嗱，網約車發牌最近成為一個社會熱門話題，究竟當局第一批發牌應該要幾多？始終係爭論，的士業嘅立場梗係愈少愈好啦，但係作為網約車司機，就一定希望愈多愈好。咁，點先至取得平衡，順得哥情阿嫂又滿意呢？就真係要靠當局智慧嘞。咪睇少依件事呀，搞得好固然人人拍掌，但如果搞唔掂，都會幾麻煩！

端午節又到嘞，又係食糭時候，記得早兩年買糭，就會去九龍城街市，嗰度有幾檔出品一流，料靚味美，遠遠就聞到糭香。今年再去，街市旁邊那一條街已經十室九空物是人非，一片冷清！其實九龍城得天獨厚，機場搬走之後，並未失去光芒，美食匯集，以及小曼谷好快又打響名堂，但係依「一舖重建計劃」，幾條街都已收購，好多出名的舖頭食肆都搬走咗。對一個曾經喺九龍城生活咗幾十年嘅我而言，真係好唏噓！無法啦，城市係要進步，只好抱住送舊迎新嘅心態，等待可見重建之後嘅九龍城，再現繁華啦！