政是政非 ﹕立法會回歸莊嚴理性議事堂

立法會4個泛民議員被DQ之後，另外15個同聲同氣嘅「兄弟姊妹」就集體辭職，立法會裡面嘅泛民就剩番兩丁友。未來幾個月，睇嚟都唔會再規程問題呀、無啦啦點人數呀，休會待續呀依啲拉布行為。希望議員可以認認真真專心審議議案，批核預算，做多一啲有利民生嘅事。

不過，留返喺議會嘅議員係咪咁諗呢？仍係一個疑問！事關上個星期，食福局個局長去議會報告疫情嘅時候，俾班議員質到口窒窒，連面都青埋。議員嗰個兇狠程度，比起以前嘅反對派有過之而無不及！一時之間，真係以為佢哋返咗嚟添！冇錯，議員嘅責任係監管政府，官員亦需要向議員說明政策同埋工作細節。過去當局好多政策同埋處理的確好戇居，搞到好擾民又達唔到效果。疫症而家去到第四波嘞，香港仲係搞唔掂，不明個案幾乎日日都有！大佬呀，香港無辦法清零，就通關冇期，影響民生極大，經濟亦頂唔住㗎喇，當局點解唔可以徹底啲大刀闊斧咁做好啲呢？又難怪啲議員咁炆憎、咁勞氣嘅！不過，炆憎還炆憎，質詢都可以態度好啲嘅，人哋都盡心盡力去做咯，有不足嘅，有唔夠完善嘅，咪提出嚟要求改善囉！見到呀局長誠惶誠恐嗰個樣，真係戥佢難過！

議事堂內係要有反對聲音，冇咗反對派對著幹，官員自不然就變咗係target ！但係都要奉勸一下班立法會議員，千祈唔好諗埋一邊，將以前反對派嗰套攞嚟用，突顯自己唔係「唯是派」，唔係舉手機器。其實，質詢都可以用一種好優雅的方式，唔一定要青筋暴現咬牙切齒嘅！立法會可以回到正軌，也希望可以是一個莊嚴互敬，理性議政的議事堂。

資深媒體人

瑋公子