政是政非 ﹕法官冇王管又點有公正審判

早嗰排，社會好有興趣咁爭論：究竟本港係唔係三權分立？搞到政府官員同埋法律專家頻頻解話。其實，正如本欄之前都講過，自開埠以嚟，香港從來就未試過三權分立。殖民地時期，立法會議員全部由港督委任，擺明就係行政主導；而終審法院放喺英國，亦都係話到明，最終權力喺「宗主國」，亦即係英國。好嘞，而家大家總算明白啦，就嗌都無謂喇！

不過，話時話，行政、立法、司法唔係分立，但有互相監督，互相制衡嘅作用。但係司法獨大，欠缺監督，就係本港一直存在嘅漏洞。政府可以日日被人鬧，立法會議員亦都可以被DQ，但喺以前，有冇人敢狠狠咁去鬧法官！因為佢哋有個光環喺頭頂，設定必係品格高尚，思想健全、大公無私嘅！而且法官仲有把尚方寶劍喺手，話你唔尊重佢分分鐘告你藐視法庭！當然，告藐視法庭要有一定法律理據，但係市民大衆都係一知半解，為免踩地雷，所以對法官嘅批評就可免則免啦！至於法官本身，由於要保持獨立性，佢哋亦都避免廣泛社交，保障判咗案公正，逐漸令公眾對佢哋嘅印象，充滿神秘感！

嗱，世事嘅嘢就係咁嘞，搞搞吓法官就變咗自成一國，佢哋有佢哋嘅文化、交際圈子、同埋遊戲規則，人哋也懶得去理，就算想理亦都唔知點理！其實，無所謂嘅，如果佢哋嘅工作唔影響他人，邊個得閒去管佢吖，正所謂，你有你嘅生活，我繼續我嘅忙碌吖嘛！之但係，法官係要判案㗎噃，佢嘅判決，係影響人一世㗎噃，有乜差池，嗰個人嘅人生就此玩完！所以，如果個法官情緒唔好，精神有問題，又或者內心深處有偏見，都會影響案件嘅公正性。其實都幾令人擔心㗎！

法官都係人，都會有病，有情緒，亦都有七情六慾，一旦情緒慾望戰勝理智，判斷就有偏差。舉個例子，應該有30幾年喇，本港有個犯人，連續兩次因涉嫌販毒被捕，佢喺法庭受審嗰時，咁啱又遇上同一個法官，結果兩次都被判罪成，但係只需罰款1蚊。嗱，你哋會問：有冇搞錯呀，嗰官痴咗線咩？係呀，估啱咗，後來真係發覺個法官原來真係患上精神病！係咪好得人驚呢！

最近，大家有冇發覺到律政司喺法官判案之後，要求重審、判刑覆核嘅事件多咗呢？係囉，即係話，上述大家所擔心嘅事可能已經正在發生嘞！回心一諗，喺咪係時候好好檢討一下現行對法官嘅監管機制呢？制度有漏洞，及早堵塞，先會持之以恆，逃避，始終唔係辦法，大家真係要好好思考！

資深媒體人

瑋公子