政是政非 ﹕改革選舉　好戲在後頭

北京嘅兩會會議係政圈大事，雖然討論嘅係國家政策，但唔多唔少都有涉及香港事務。今年更加不得了啦，事前已經盛傳會有改革香港選舉制度嘅方案，關心政治嘅人士梗要牛咁眼?到實啦！嗱，今年涉及香港嘅全國人大會議的第七項議程，為《全國人民代表大會關於完善香港特別行政區選舉制度的決定（草案）》，會議就未開，消息已經滿天飛。

消息人士就話：立法會將有翻天覆地嘅變化，由而家嘅70席大增至90席；現時地區直選佔35席會將削減；而喺2000年之後已經消失嘅「選舉委員會」議席將會「復活」，同功能組別鼎足三立，成為立法會第三大勢力。選委會議席復活，亦都意味依個組織會有所改變，有傳會由現在嘅1200人增加至1500人，而新增嘅立法會議席，亦都會由委員互選產生。嘩，依個改革真唔係講笑，成事之後香港嘅政治遊戲又會換過一個全新玩法喇！

有人就擔心，將直選議席減少會減少咗民意嘅代表性。嗱，件事可以正面啲睇，地區直選雖然係一人一票產生，但喺制度缺陷之下，選出嚟嘅係咪真係咁有代表性？質素係點？有目共睹啦！過去幾年，部分選出嚟嘅議員，玩嘢多過做嘢，政局一片混亂，正因為咁，政府施政亦都寸步難行！今次改革，將議席增加到90席，更多唔同範疇嘅人才可以加入議會，立法會嘅代表性就更大啦！老實講，地區直選依種埋身肉搏嘅泥漿摔角，唔係人人都鍾意，好多精英往往因為咁而唔肯入局，而採用選舉委員會嚟招納人才，就冇咗依個顧慮啦！

初步估計，人大會議通過咗依個選舉改革方案之後，就交人大常委會跟進，然後再交番俾香港政府完成立法程序，今年9月立法會選舉未必趕得切舉辦喇！而嚟緊幾個月，政圈就熱鬧囉，選舉委員會依個組織既要選特首，又可以有機會選立法會議員，究竟點樣先可躋身喺依1500名之內呢？將會有一個群雄力爭嘅精彩局面，我哋真係要擔定櫈仔，等睇戲喇噃！

資深媒體人

瑋公子