媒體就真的可以無的放矢嗎？

做咗咁多年人，今時今日先知道原來公務員係應該無朋友、無節慶、無人情味嘅！中秋節送禮俾朋友，正常過正常喇，但經有心人刻意誇大，連正常社交都變成官商勾結。我指嘅係有某啲專門搏出位嘅傳媒，繼早前接二連三抹黑紀律部隊之後，又有新搞作，今次老屈入境處人員收受利益。縱使有關人員作出回應，解釋左送禮物嘅係老友，又無公事往來，啱哂規矩，該媒體依然自說自話，指鹿為馬，真係慌死天下太平。

其實呢單野四個字講哂，誤交損友。唔係話兩位入境處人員識錯人，錯就錯在佢哋老友係恒大做野。恒大係內地企業，加上呢排又當黑，唔係衰呢樣，就衰嗰樣，形象同股價都插哂水，認真生人勿近！所以呢單野咪俾人發大嚟寫囉，如果換轉送嘢嘅係間深黃企業，你估結果又會點？

人類係群體動物嚟嘅，正常社交、節日禮儀呢啲唔使教喇。點知有班人好似無受過教育、未社會化咁，見到人大時大節送禮俾朋友就嘩嘩叫。仲要人地講到明係無公事來往嘅朋友，咁又何來利益輸送呀大佬？申請簽證都算公事來往？咁全香港人都同入境處啲職員有公事來往喎，話哂你同我都有身份證、有出世紙，咁仲唔算同人哋啲職員有公事來往？哈哈，傻的嗎？估唔到我哋咁先進嘅社會竟然有人認為所有入境處職員應該斷六親，真好笑。

聽人哋報導話個果籃好靚好正，標價成三千銀喎。不過又有報導話二千幾蚊，咁究竟幾銀架？其實疫情搞到經濟麻麻，行街買野成日都見有優惠，大時大節更加唔使講喇，所以邊有人要俾原價買呢啲送禮嘢架？算喇，人哋無禮貌少送禮又點會知呀，見到其他人送賀禮仲好似細路哥發現新大陸咁添。

最最最好笑係講到送個果籃就可以推倒成個入境處咁，人哋部門成立左六十年，樣樣都有板有眼，有政策、有機制、有程序，唔係同你熟就乜都得，係乜都要跟足程序先得。你估好似某啲媒體咁，對人不對事，專追住紀律部隊嚟咬咩。入境處一直都盡心盡力服務我哋，佢哋嘅水準同質素都係有目共睹嘅，無理由因為有心人炒作下呢兩個果籃仔，就令我哋懷疑呢個咁專業正直嘅部門下話。其實我地都知道媒體有政治立場，亦知道媒體可以合理懷疑，但媒體就真的可以無的放矢嗎？我地生於呢個假新聞滿天飛的年代，真係要時刻保持清醒，認清事實，唔好俾人挑撥分化，否則就會正中呢班反中亂港分子嘅下懷喇。

資深媒體人

隷四權