香港郵政一於私營化啦！　文：瑋公子

最近，政圈同坊間都嘈得好交關，就係香港郵政營運基金在2024/25年度錄得破紀錄的8.21億元虧損，累計連續8年出現赤字依件事，正因為咁，政府向立法會申請46億元撥款支持香港郵政運作。近年自從電子通訊以及社交平台普及，人與人之間的郵遞書信已經大幅減少，郵政虧損主因係傳統信件量結構性減少，加上營運成本有增無減，「生意」難做在所難免。

其實，最致命嘅因素，係香港郵政並唔係獨立的私人企業或法定機構，而係一個政府部門。目前佢係以「營運基金」模式運作，財政上要自負盈虧，但喺法定身份、商業擴展及營運決策上，下下就受到政府部門框架的嚴格限制，咁就認真弊傢伙啦！

嗱，先同大家講下有關香港郵政嘅體制現況。1）佢係屬於政府決策局（商務及經濟發展局）轄下部門，並唔似其他國家咁「公司化」或者「私有化」。2）佢用營運基金模式運作，自1995年起自負盈虧，透過日常郵遞及集郵等業務收入維持運作。不過，大家應該明白，正正因為佢係政府部門，佢哋所有員工都係公務員，薪酬和福利比私營企業高，人力資源調配又缺乏彈性，營運策略又俾公務員體制限制咗市場競爭力，此消彼長之下想要賺錢盈利，談何容易。咁，咪係蝕足10年囉！

香港郵政連續8年錄得虧損，早前向立法會申請撥款46億元，翻新空郵中心及支持未來三個年度的運作。在議事廳上，不乏聽到一啲對香港郵政嘅批評，查實佢哋真係好無辜，用營運基金模式自負盈虧，但營運策略又諸多限制，有好嘅idea都下下申請等批，試問，被人綁手綁腳，就算「宇宙最強」都冇符啦，唯有捱打！

嗱，香港郵政如果唔係用營運基金模式，好似30年前咁是政府部門，好似其他部門咁列入政府經常性預算之內，可能就唔係今日咁嘅結果。當年政府要將依個部門採取咁嘅方式經營，係想為庫房減負擔，想賦予部門保留收入同埋靈活調配資源嘅權利，方便更迅速咁應對市場轉變，提升生產力。不過，過去10年以來，成效好唔理想，依個模式喺實際運作中面臨唔少掣肘（例如郵費定價及薪酬機制仍受政府規管），加上近年郵件量大跌，營運基金面臨極大的財政挑戰。其實，今時今日，時移勢易，政府乾脆收回營運基金模式，亦未必係壞事！

查實好多國家已經將郵政服務外判、公司化或轉為私營，有啲仲有好可觀盈利。反觀香港郵政在10年前開始連年虧蝕，管理層長期以來由缺乏營商經驗嘅政務官員出任。喂，要自負盈虧喎，即係做生意啦，政務主任係精英，但佢哋唔係生意佬嘛，又點可以期望佢哋同私營企業競爭呢？依種營運基金模式，今時今日已經唔啱使，試咗咁多年冇起色，今日仲要申請撥款，香港郵政飽受批評，既不好受，政府亦面對「長貧難顧」嘅困境！

睇吓其他地方吖，其實都有好成功例子，例如國家嘅中國郵政儲蓄銀行分行遍及全國鄉鎮，提供綜合性嘅金融服務；至於香港人最鍾意比較嘅新加坡，佢哋嘅國家郵政（SingPost）連地產生意都做埋；德國郵政喺1995年私有化之後，更成功成為全球數一數二的國際快遞公司DHL。

老實講，香港郵政員工而家嘅開支（包括薪酬及長俸等），佔總開支差不多8成，好難預期依個部門可以喺3年後轉虧為盈。當局到今天仍然只係諗攞錢「填氹」，又冇長遠規劃。咁幾十億使完，唔通3年後又申請撥款咩！計我話，政府當局要考慮嘅係一個長遠策略，乾脆收回恢復為政府部門，又或者俾佢私營，轉為公司化，俾佢係政府架構之外靈活經營商業活動，去補貼虧本的郵遞服務，香港郵政私營化自創出路，自尋生機，自負盈虧先至公道嘛！

好勒今日講住咁多先，下次見！