執法加點人情味更perfect 　文：瑋公子

聽聞因為大埔宏福苑火災嘅影響，食環署早喺3個月前已經率先「做嘢」，話「要消除小販排檔區防火隱患」，成立特別小組，通報各區檢視小販檔是否合乎規格。當然，如果發現唔規格嘅販檔，就難逃「食告票」嘅厄運嘞！

不過，據聞每個分區處事手法不一，有啲只係提醒勸告，一般而言，小販都会配合。但有啲區嘅人員就頻頻出擊檢控。搞到班小販心驚膽跳，嗌哂救命！例如灣仔春園街交加街啲小販，4月中先接到通知，5月13日一個晚上，班制服哥哥姐姐大舉出動，話啲檔口規格唔啱，連抄50幾檔，大多數仲係一檔抄2張告票。很多小販雖然已經解釋話正在安排工人排期維修，但依然無情講，照抄可也，班小販只能徒嘆奈何！

本來，喺減低火警隱患嘅前提下，加強防火意識，做好防火規格係好事，但係如果過咗龍就唔係幾好啦！嗱，舉個例：小販攤檔上蓋唔可以有易燃物，咁係啱嘅，但係拆除易燃物都要等持牌嘅鐵工匠嚟做架，既然小販已經講到明叫咗人嚟拆，咁俾一兩日酌情寬限期都唔係過分吖！

又例如，攤檔旁邊唔可以有上蓋遮擋，又不可以同鄰邊檔相連，結果發現上蓋有伸出幾吋嘅又被抄牌！瑋公子明白，依啲上蓋如果有易燃物品，一旦著火，可能會造成好似之前花園街火燒連環檔慘劇。但係執法係咪可以唔咁tough，採取比較懷柔手段，先警告後執法，大家係咪都舒服啲呢？

另外，根據規定，小販檔嘅上蓋，收檔之後要將伸出部分縮返入去，但係部分攤檔旁側上蓋，10多年嚟飽經風霜，都已經銹蝕到連住個頂，唔可以移動，所以有啲小販乾脆就將佢鋸斷，以為咁就一了百了啦，點知仍被指因唔符合當局「小販收檔須收回上蓋」嘅指令，又要收告票。大家都知啦，今時今日香港嘅小販，好多都有番咁上下年紀啦，D公公婆婆每晚收檔，要危危乎爬上櫈仔，攞枝竹竿去推返個上蓋縮入；萬一不小心跌傷就唔好啦！

仲有一樣野搞到瑋公子都好迷惘，就係啲菜檔喺過去幾十年嚟都係用發泡膠箱裝蔬菜啦，唔知係咪宏福苑火災嘅發泡膠封窗，可能導致場火蔓延咁快嘅原因。當局忽然將發泡膠盒列為易燃物品，禁止晚上存放喺攤檔內，就算小販用鐵皮包住賣剩菜蔬嘅發泡膠箱，仍然被抄牌，食告票！大佬，蔬菜喺內地運嚟全部用發泡膠箱啦，蔬菜統營處都係用發泡膠箱喎，點解佢哋又得，小販又唔得呢？其實發泡膠箱內裝住新鮮蔬菜之外，有大量冰塊冰水保鮮，燒唔著㗎！

依家香港經濟麻麻，小販生意難為，仲要日日擔驚受怕捱告票，又真係幾慘嘅！法律不外乎人情啫，當局執法目的係防患於未然，如果加上少少人情味，咁就perfect喇！