政是政非 ﹕神仙難救12瞞徒

依個世界，只要你夠大聲，厚臉皮，又巧舌如簧，明明自己指鹿為馬，但係就夾硬講到係人哋指鹿為馬，咁你就得架喇！而家啲人立場先行，最緊要你講啲嘢啱佢聽，理得合唔合邏輯唧，一味盲撐，吹咩！

係囉，就係講緊嗰12個偷渡去台灣，俗稱12瞞徒嘅棄保疑犯囉，佢哋俾內地公安扣押之後，一班聲稱話係佢地家屬嘅人，由阿朱議員同埋涂律師陪同見記者，投訴香港政府唔肯幫忙引渡佢哋返嚟。依個記者會認真搞鬼，十幾個聲稱家屬嘅人著到好似蒙面超人咁，幾乎係男係女都睇唔清楚！大佬呀，而家你哋係要展示偉大嘅父母之愛，救你哋個仔呀，點解連真面目都唔敢見人呀？如果你哋堅信自己個仔冇犯法，駛乜咁閃縮呀？你哋蒙住塊面，鬼知你係咪真係人哋老竇老母咩！

嗱，少女浮屍碧海，個老母攞埋身分證，驗埋DNA都俾人質疑佢唔係真老母，用番同一個標準，依班人又冇出示身分證，又冇驗DNA，仲蒙埋面添，好難唔令人質疑噃！仲有呀，近排發生嘅「釘書釘」事件同埋唔少「演員」喜歡喺唔同場合扮演下不同角色，依啲所謂受害者，究竟係真係假，真係搞到人好鬼迷惘！正所謂烏鴉唱歌仔，唔出聲由自可，一出聲嚇親人，其中一個所謂嘅家屬，居然夠膽死話自己個仔其實嗰日出海，只不過係去釣魚，唔係偷渡，而且證據確鑿㗎，因為佢見個仔出門嗰時拎住魚桿同埋兩桶水㗎！哈哈，冇雷公咁遠拎住兩桶水去釣魚？練大隻咩！又當你釣魚係真嘞，咁你隻船出咗邊界釣魚又有冇犯法呢？阿叔，你個仔有冇申請出境呀，有冇捕魚證呀？如果冇，就係違法囉，咁朱議員同埋涂律師又點幫你呀？你咁著緊個仔，就除咗個面罩口罩，俾啲誠意見人啦！

到咗而家依個局面，12瞞徒俾內地刑事拘留在所難免喇，將來仲有可能面對更多控罪同埋刑責。其實，揾朱議員同涂律師出面去救，佢哋只能盡人事㗎咋，事關佢哋當日咁激烈反對逃犯條例，都冇諗過要喺內地引渡逃犯返嚟依回事。唔知係咪現眼報，咁快真係要引渡喎，又未有其他方法，點搞呢？大佬呀，內地有內地嘅法律，唔理你係內地人抑或香港人，任何有法治嘅地方都唔容許任何人違反法律。涂律師話：「有法治國家似乎會將12人送香港依法處理」，咁想問吓涂律師：本港有位前高官早排無啦啦俾美國佬話佢行賄，拘禁之後，連家人都唔俾見，結果喺美國坐咗幾年監。用番同一標準，咁美國唔將佢送返嚟香港依法處理，涂律師向來推祟嘅美國，係咪就冇法治呢？

睇嚟，12瞞徒依舖神仙難救，點都要完成咗內地嘅刑期先返得嚟㗎喇！

資深媒體人

瑋公子