政是政非：掃一掃　安心出行　文：瑋公子

自從政府放寛限聚令，可以4人同枱，兼且晚飯食到10點之後，我哋嘅生活開始慢慢正常番喇！夜晚行出街當堂多咗好多人，條街冇咁靜，個市感覺上好似旺番好多。的確係，約埋幾個知己食餐飯，吹吓水，真係一個好好嘅減壓方法，香港人依兩年，不知不覺抵受咗嗰啲無形壓力，其實唔覺唔覺積埋，都好大鑊㗎！

嗱，食飯吹水自不然話題多多，政府搞咗個「安心出行」App，規定市民出入食肆都要掃一掃，逐漸成為大家嘅習慣，亦例必成為飯局嘅熱門話題。「喂，老友，你掃咗未呀？」依句說話，坐喺食肆兩個鐘，起碼都聽到幾次。依個App可以話係食肆放寬限聚同埋同枱人數嘅條件之一。當局要求食肆有責任監督顧客入座時，必須要掃一掃，留低紀錄方便追尋，係防疫措施嘅重要步驟，如果人人配合，對抗疫防疫好大幫助。但係係徧徧有人諗壞腦，話自己個私隱權俾人侵犯咗喎！所以就採取不合作態度。

香港幾乎人人都有手提電話啦，下載個App其實話都冇咁快。但係當局仍然考慮到有部分人士唔係咁識做依個動作，於是容許可以用文字紀錄方式，顧客只要填低簡單資料就搞掂。點知，仲係有人鍾意玩嘢，唔肯正正經經咁填，寫埋哂啲冇厘頭資料，假嘅電話號碼。食肆職員怕得罪客人，又怕引起紛爭，當睇唔到，唯有照單全收！仲有呀，先幾晚食飯，公子亦親眼見到一個現象，同枱4人，除咗公子同另一位朋友乖乖咁掃咗個App之外，同枱一對夫婦，根本就當冇件事，坐低就叫餸食飯！我哋問佢點解唔掃一掃，佢哋就一副不以為然嘅樣，睬你都嘥氣！唉，依對夫婦屋企從來唔開飯，晚晚出街食，係依間食肆常客，佢唔掃App，職員都唔敢提，於是制度就有嘞，不過就冇切實執行，佢哋冇事由自可，有起事上嚟，點追查呢？

人要自重，先至得人尊重，安心出行App嘅作用，大家都明，佢係要大家重視、配合，所發揮嘅作用先至更大。咪淨係識得批評啦，合作啲，每人做好本份，一齊抗疫先至成功。

資深媒體人

瑋公子